ប្រែសម្រួល៖ តារា

ប៉េកាំង៖ ក្រុមហ៊ុនបច្ចេកវិទ្យាចិន Alibaba កាលពីថ្ងៃពុធបានចេញផ្សាយកំណែថ្មីនៃម៉ូដែលបញ្ញាសិប្បនិម្មិត Qwen 2.5 ដែលខ្លួនអះអាងថាលើសពី DeepSeek-V3 ដែលទទួលបានការកោតសរសើរយ៉ាងខ្លាំង។

ពេលវេលាចេញផ្សាយដ៏ចម្លែកនៃ Qwen 2.5-Max នៅថ្ងៃទីមួយនៃឆ្នាំចន្ទគតិ ដែលប្រជាជនចិនភាគច្រើនឈប់សម្រាកនិងស្ថិតនៅជាមួយគ្រួសារ បង្ហាញពីសម្ពាធដែលការកើនឡើងយ៉ាងឆាប់រហ័សរបស់ក្រុមហ៊ុនបណ្តុះបណ្តាលថ្មី DeepSeek ក្នុងរយៈពេលបីសប្តាហ៍កន្លងមកនេះ មិនត្រឹមតែលើគូប្រជែងបរទេសប៉ុណ្ណោះទេ ប៉ុន្តែថែមទាំងការប្រកួតប្រជែងក្នុងស្រុកផងដែរ។

“Qwen 2.5-Max មានសមត្ថភាពល្អជាង… ស្ទើរតែគ្រប់ផ្នែកទាំងអស់នៃ GPT-4o, DeepSeek-V3 និង Llama-3.1-405B” នេះបើយោងតាមសេចក្តីប្រកាសរបស់ផ្នែកCloud របស់ក្រុមហ៊ុន Alibaba នៅលើគណនី WeChat ផ្លូវការរបស់ខ្លួន ដោយយោងទៅលើម៉ូដែល AI កម្រិតខ្ពស់បំផុតរបស់ OpenAI និង Meta។

ការចេញផ្សាយជំនួយការ AI របស់ DeepSeek ដែលដំណើរការដោយម៉ូដែល DeepSeek-V3 នៅថ្ងៃទី១០ ខែមករា ព្រមទាំងការចេញផ្សាយម៉ូដែល R1 របស់ខ្លួននៅថ្ងៃទី២០ ខែមករា បានធ្វើឱ្យ Silicon Valley ភ្ញាក់ផ្អើល និងបណ្តាលឱ្យភាគហ៊ុនបច្ចេកវិទ្យាធ្លាក់ចុះ ដោយសារតែថ្លៃដើមអភិវឌ្ឍន៍និងប្រើប្រាស់ដែលទាបរបស់ក្រុមហ៊ុនបណ្តុះបណ្តាលថ្មីរបស់ចិននេះ បានធ្វើឱ្យវិនិយោគិនចាប់ផ្តើមសង្ស័យលើផែនការចំណាយដ៏ច្រើនរបស់ក្រុមហ៊ុន AI ឈានមុខគេនៅសហរដ្ឋអាមេរិក។

ប៉ុន្តែជោគជ័យរបស់ DeepSeek ក៏បានបណ្តាលឱ្យមានការប្រញាប់ប្រញាល់ក្នុងចំណោមគូប្រកួតប្រជែងក្នុងស្រុកដើម្បីធ្វើបច្ចុប្បន្នភាពម៉ូដែល AI របស់ពួកគេផងដែរ។

ពីរថ្ងៃក្រោយការចេញផ្សាយ DeepSeek-R1 ក្រុមហ៊ុនម្ចាស់ TikTok គឺ ByteDance បានចេញផ្សាយការធ្វើបច្ចុប្បន្នភាពម៉ូដែល AI សំខាន់របស់ខ្លួន ដែលបានអះអាងថាល្អជាង o1 របស់ក្រុមហ៊ុន OpenAI ដែលគាំទ្រដោយ Microsoft នៅក្នុងការធ្វើតេស្ត AIME ដែលជាការវាស់វែងថាតើម៉ូដែល AI យល់និងឆ្លើយតបទៅនឹងការណែនាំស្មុគស្មាញបានល្អប៉ុនណា។

នេះស្របគ្នានឹងការអះអាងរបស់ DeepSeek ដែលថាម៉ូដែល R1 របស់ខ្លួនអាចប្រកួតប្រជែងជាមួយ o1 របស់ OpenAI លើបទដ្ឋានវាស់វែងសមត្ថភាពមួយចំនួន៕

ប្រភព៖ Reuters